Recomendamos: Radio BuleBule, de Paco Nogueiras

Radio BuleBule é o novo traballo musical, en formato de libro-CD, de Paco Nogueiras, publicado por Kalandraka.

“O medio radiofónico inspira as 12 cancións deste novo libro-cd-dvd no que volven participar o ilustrador David Pintor e José Miguel Sagüillo dirixindo os videoclips que, como novidade, forman unha curtametraxe. Os temas dispóñense ao xeito da grella de programación dunha peculiar emisora na que non faltan sintonía de entrada, axenda cultural, magazine de variedades -tendencias, ciencia, natureza…-, música, faladoiro, noticias, información deportiva e previsión meteorolóxica.

Conta cun limiar de Xurxo Souto, e epílogo de Ponte… nas ondas!, e as colaboracións dos xornalistas Ana Romaní, Xabier Fortes, Xosé Manuel Pereiro, María Xosé Rodríguez, Susana Pedreira, Tino Santiago, Fernanda Tabarés, Ainhoa Apestegui, Pablo Lago, Henrique Sanfiz, María Solar e Emilio Españadero.”

Presentación do libro Depor Vida. Crónica da tempada 2012/2013

Depor Vida é a crónica da tempada 2012/2013 do Deportivo da Coruña, feita polos xornalistas Rosabel Candal e Xerardo Porto. No acto, que terá lugar o mércores 3 de xullo, ás 20:00 horas, na Biblioteca da Asociación de Veciños Atochas-Monte Alto (Campo de Marte-Rúa da Torre), participan, xunto aos autores, Henrique Sanfiz e o adestrador do Depor, Fernando Vázquez.

Este é un petisco do libro:
“E o mellor de todo: foi quen de devolver a ilusión a todo o mundo: aos futbolistas, ao club, aos afeccionados, á cidade… O deportivismo renaceu. Os seareiros asumiron o discurso de Vázquez e fixeron seu o lema “pódese”. Claro que só faltaba o máis complicado: despois de tres vitorias en 23 partidos, había que gañar sete ou oito (eran as contas do míster) en quince. Todo un reto, que se volveu máis complicado aínda tras catro xornadas sen acadar o triunfo: sete/oito vitorias en once partidos.”