Recomendamos: Noró, de Xabier Díaz

Noró, de Xabier Díaz e as Adufeiras de Salitre, é o último traballo publicado polo autor.

“É unha ollada ás músicas setentrionais, unha declaración de amor ao norte que nos chega despois da exitosa xira do multipremiado The tambourine man (2015).
Nurtha, Nord, Norte… Noró
O norte é case un estado emocional para min. Gústame o seu frío, a auga, a humidade e a música.
“Este disco é como un retrato do meu timeline recente, como unha necesidade de acabar a talla e de mellorar o método, como unha insistencia de Tambourine, como se quixese tatuar con tinta indeleble o mapa das últimas viaxes para saír definitivamente da miña confusión antes de desorientarme de novo. Este disco tamén serve para celebrar o equilibrio desta pequena e ordenada república adufeira na que tantas cousas aprendo sen necesidade de que ninguén as explique.” (…)”

Recomendamos: Fake, de Talabarte

Fake é un libro-disco do grupo Talabarte (Quim Farinha, Kin García e Pedro Pascual), publicado por Fol Música, e que foi PREMIO MARTÍN CÓDAX DA MÚSICA 2017 na categoría de músicas do mundo. PREMIO OPINIÓN DA MÚSICA DE RAÍZ 2017 ao mellor álbum.

“Cóntase que os Talabarte viaxaron durante 15 anos a bordo do Tradincerto, un aparello antigo de despezamento,e descubriron unha serie de historias que espertaron o seu interese e fascinación. De moitas destas historias coñeceron varias versións: a oficial, que é a que soe estar escrita nos libros, ou a popular, que é a que pertence á memoria da xente; outras eran falsas e fixéranlles crer na súa veracidade; tamén as había das que formaban parte de lendas ou tradicións… Pero axiña se decataron de que todas elas tiñan algo en común: a incerteza de non saber se eran verdadeiras ou falsas. E así foi como comezaron a interesarse polo mundo dos “fakes”.
Ao longo de todo este tempo, foron recollendo este valioso material mergullándose nas bibliotecas, museos e hemerotecas… Pero tamén nas tabernas e lugares de xuntanza de todas as aldeas.
Foi precisamente nestes furanchos onde os Talabarte beberon desa tradición e descubriron a súa música. Primeiro aprenderon a tocala, mais co paso dos anos mesmo chegaron a falala con destreza a través dos seus instrumentos. Falaban mazurcas, schottish, milongas, polskas ou tarantellas cun sotaque tan próximo ao son orixinal que ata había quen pensaba que estes músicos tamén eran nativos de alí -aínda que para quen os coñecemos, ben sabemos que dalgún xeito levan escrito no seu ADN ritmos tan nosos e senlleiros como a muiñeira, a xota ou o pasodobre-.
Con ilustracións de Pablo Xiráldez “O Pastor”, textos de Carlos Meixide e músicas que, inspiradas por esas historias que non se sabe canto teñen de real e canto de mentira, Fake bebe da tradición europea de ritmos bailables. Contemporaneidade e tradición xuntas nun directo orixinal e impactante. Imposible acougar os pés e non deixar voar os sentidos con Fake.”

María Fumaça. As que máis molan!!!, de Uxía e Magín Blanco

María Fumaça, As que máis molan!!! é o novo traballo musical, en formato de libro-CD, do proxecto guiado por Uxía e Magín Blanco, publicado por Galaxia.

“Estamos de festa, cumprimos 5 anos de viaxe enchendo vagóns de amizade e de alegría, pero tamén de convivencia e integración do diferente.

O noso maquinista Ruí e toda a familia María Fumaça celebrámolo reunindo un feixe de éxitos e dúas novas cancións para incorporar ás vosas favoritas. As que máis molan é a nosa maneira de demostrarvos o moito que vos queremos. Témosvos sempre no noso corazón.”

Recomendamos: Radio BuleBule, de Paco Nogueiras

Radio BuleBule é o novo traballo musical, en formato de libro-CD, de Paco Nogueiras, publicado por Kalandraka.

“O medio radiofónico inspira as 12 cancións deste novo libro-cd-dvd no que volven participar o ilustrador David Pintor e José Miguel Sagüillo dirixindo os videoclips que, como novidade, forman unha curtametraxe. Os temas dispóñense ao xeito da grella de programación dunha peculiar emisora na que non faltan sintonía de entrada, axenda cultural, magazine de variedades -tendencias, ciencia, natureza…-, música, faladoiro, noticias, información deportiva e previsión meteorolóxica.

Conta cun limiar de Xurxo Souto, e epílogo de Ponte… nas ondas!, e as colaboracións dos xornalistas Ana Romaní, Xabier Fortes, Xosé Manuel Pereiro, María Xosé Rodríguez, Susana Pedreira, Tino Santiago, Fernanda Tabarés, Ainhoa Apestegui, Pablo Lago, Henrique Sanfiz, María Solar e Emilio Españadero.”

Recomendamos: Pakolas, de Paco Cerdeira

Pakolas é o novo traballo musical, en formato de libro-CD, de Paco Cerdeira, publicado por Galaxia.

“Cancións para rockandrollear, para soñar, para non parar de mover o esqueleto e de aprender.

Pakolas é un libro-CD que recolle na edición 10 novas cancións orixinais e tamén un dos contos que engloba o proxecto, e como novidade aporta a colaboración para a súa elaboración co Colexio Profesional de Logopedas de Galicia, co que o autor traballou dende un primeiro momento. Deste traballo conxunto nacen estas cancións pero tamén os contos que as acompañan, xerando unha historia fantástica cunha parábola ou moralexa final, ademais de material complementario pedagóxico ao que se poderá acceder de xeito multimedia, xunto co resto dos contos. Así tanto estes profesionais logopédicos, como os centros escolares ou os propios lectores, a través dun código BIDI, atoparán materiais adicionais ademais do propio contido do libro.

A ilustración do libro corre a cargo da creatividade de Laura Romero, licenciada en Belas Artes na Universidad de Salamanca, que consegue darlle vida a eses animais protagonistas das cancións e contos fantásticos, a través das imaxes cheas de colorido.”

Concerto-presentación de Pitusa Semifusa e os estilos musicais, de Olga Brañas, o sábado 21 de outubro ás 12 h.

Con Pitusa Semifusa e os estilos musicais, de Olga Brañas, poderás coñecer o blues, o reggae, o funky, o swing, o hip hop… e non pararás de cantar e de bailar!
A vida está chea de cores e de sabores diferentes, tamén de estilos musicais.

Recomendamos: Pasatempo, o novo disco de Radio Cos

Pasatempo é o novo disco de Radio Cos, publicado estes días.

“RADIO COS, uns pandeireteiros de sona que fixeron evoluír a nosa música naturalmente.
Xurxo Fernandes e Quique Peón, cantantes e percusionistas do grupo, son dous referentes no eido da investigación etnográfica en Galiza. As melodías utilizadas neste proxecto pertencen aos seus arquivos de gravacións de campo, traballo que levan facendo por todo o país desde hai máis de tres décadas.
Vai para xa nove anos que RADIO COS leva percorrendo escenarios en Bélxica, Inglaterra, Escocia, Bretaña e Galiza transmitindo o seu modo de entender a nosa música tradicional.
Agora preséntannos o seu primeiro disco, música de raíz que mestura a sonoridade máis arcaica con elementos tirados da propia tradición e melodías alleas que gardan relación co país.
A banda confórmana tres prestixiosos músicos: Pedro Lamas na gaita e saxo soprano, Nikolay Velikov no violino e Xan Pampín no acordeón.
Este traballo, concebido con forza e alegría, quere mostrar a invisibilidade que sufren as culturas minorizadas a pesar de estar aí, de arrodearnos, de ser verdades manifestamente palpábeis.”

Presentación e coloquio do escritor portugués Samuel Pimenta con Pedro Casteleiro, o 21 de outubro ás 20:00 h.

14666306_10210309194907537_3041715881479942454_nA sexta feira 21 de outubro, polas 20:00 horas, terá lugar a apresentación do poemario Ágora e a obra narrativa Os Números que Venceram os Nomes, do escritor portugués Samuel Pimenta, quen manterá unha conversa co poeta galego Pedro Casteleiro. No acto participará tamén o músico Pedro Campos.

Deixamos aquí a entrevista ao autor publicada na revista Palavra Comum. e tamén a ligazón ao seu blogue.

Samuel Pimenta foi o gañador do IV Prémio Glória de Sant’Anna neste 2016, do que foi tamén finalista Pedro Casteleiro.

Presentación do disco Raíces aéreas, con Mónica de Nut e Luís Martíns

OMónica de Nut Raíces aéreas xoves 15 de setembro, ás 20:30 horas, na nosa libraría, Mónica de Nut (voz) e Luís Martíns (arpas celtas acústica e eléctrica) presentan o seu disco Raíces aéreas, gravado pola discográfica Freecode. Colabora Lucía Martínez nas percusións, zanfona e obxectos sonoros. Son e master Isaac Millán, Lagharteira Produccións. Deseño gráfico e fotografías Uqui Permui.

“O elemento inspirador son as gravacións de recollida de campo en Galicia, cantos de mulleres que transmiten toda a forza ancestral. Cantos crus, vitais e poderosos, conéctannos á raíz de saber de onde vimos e cal é a nosa esencia. Enormemente agradecidas por este manantial, e con moitísimo respecto, recreamos esa herdanza aportando as nosas ás mediante a voz e a arpa.”

Se queredes coñecer máis deste proxecto podedes escoitar algúns temas no perfil de Soundcloud, ou ver e escoitar Seitura aquí:

foto-RAICES-1

Recomendamos: o novo traballo musical de Xosé Lois Romero e Aliboria

Aliboria Xosé Lois Romero e Aliboriaé a nova proposta musical de Xosé Lois Romero & Aliboria.

“Aliboria é un colectivo de novos músicos galegos (formado por María Montero, Jorge García, Andrea Montero, Ramón Dopico, Cristina Sánchez, Mariana Montero, Antonio Prado, Alejandra Montero e Cristina Pico), dirixidos por Xosé Lois Romero, que reinventan os cantos e os ritmos enxebres de Galicia conxuntando as potentes voces das súas cantantes cuns novos arranxos para percusión tradicional cheos de forza, raza e terra.
As mulleres e homes que conforman Aliboria representan unha nova xeración de músicos cun coñecemento profundo do seu folclore e cunha gran calidade técnica, un equipo perfecto para que o mestre Romero dea un novo paso adiante na evolución da música popular galega, que está a vivir o seu momento máis fértil e en permanente proceso de actualización.
A música de Aliboria combina as voces ancestrais da tradición oral de Galicia coa forza e o colorismo multitímbrico da percusión tradicional, todo tinguido coa frescura e a enerxía que a xuventude dos seus membros lle aporta.
Bombos, pandeiros, pandeiras, tixolas, tarrañolas, cunchas, pandeiretas, latas, tambores, sachos, perfectamente conxunguidos cos cantos, os aturuxos, os bailes e a diversión.
En 2016 publican o seu primeiro disco, como presentación desta nova proposta que nace coa vontade de amosar ao mundo a vitalidade da música galega.”